IMPHILO LENHLE SIKHATSI SONKHE SEKUPHILA KWAKHO
Kudla ngalokunemphilo
IMPHILO YAKHO ISETANDLENI TAKHO
Incwajana 2
Singeniso
Tinyenti kabi tifo lesititfola ngekwelufuto kubatali nabokhokho betfu. Kuba kuncane nome kube ngekho lesingakwenta kutsi sivimbe leto tifo.
Noko-ke, tikhona letinye tifo lesititfola tibangelwe yindlela lesiphila ngayo.
Uma ngabe:
singadli kudla lokufanele singanakekeli imitimba yetfu kungenteka sitfole letifo.
Leti tibitwa ngekutsi tifo letibangwa yindlela yekuphila.
Lencwajana iniketa ngelwati mayelana naletinye tetintfo longatenta kute uvikele letifo.
Khumbula, kutsi ngumtimba wakho. Imphilo yakho isetandleni takho. Ngako-ke, tinakekele.
Lencwajana letsi Kudla Ngalokunemphilo ingulenye yeluchule lwato letincwajana.
Letinye taletincwajana letikuloluchule ngunati:
Letinye taletincwajana letikuloluchule ngunati:
Kugcina ematinyo nemlomo wakho unemphilo
Ngikhetsa kungasebentisi ligwayi
Kuhlala ushukumisa umtimba kute ube nemphilo
Kunatsa tjwala ngalokulingene
Kunakekela imitimba yetfu
Kudla kubaluleke kabi emphilweni. Kudla kuphindze kwente imphilo ibe mnandzi. Asewucabange kutsi kusijabulisa kanganani kudla kudla lokumnandzi nemindeni yetfu; nekutsi lawo madzili agcina angajabulisi ngalokwenele nangabe kungekho kudla lokumnandzi lokunyenti.
Naloku kusijabulisa kudla, kubalulekile kutsi sidle ngekucaphela. Fundza lencwajana kutfola kutsi kubaluleke ngani kudla nekutsi sidzinga kudla ini kanye nekutsi kube nganani.
Cedzani lendengane nelubisi nine bantfwana, sesikhatsi sekutsi nihambe niye esikolweni
Kudla lokukahle kusita kutsi nifundze kahle
Imicondvo nemitimba yebantfwana labasakhula idzinga kutfola linani lelifanele lekudla malanga onkhe kute itfutfuke ngalokufanele
Dudu, kuya ngani kutsi silwane lesikhulu kangaka sitfole tidzingo taso tekudla ngekudla tjani bodvwa?
Uyabona Rachel, umtimba wemuntfu usebenta ngendlela lehlukile? sidzinga kudla lokunemphilo lokutinhlobo letehlukene kute sibe nemphilo nekutsi sibe ngulabacinile
Ngena utewunatsa litiya Dudu?kukhona nemakhekhe lamnandzi lekete nadzadzewetfu edolobheni lapho asebenta khona
Ngitawutsatsa lucetu loluncane lwelikhekhe, ngiyabonga
Leti titfombe temndeni wami ? lona ngudzadzewetfu ? utitsandza kabi tintfo letinongotelako letinashukela
Kuyabonakala , Rachel? ubukeka asidudla kakhulu ?kudla lokunashukela nalokunongotelako kubanga kukhuluphala kakhulu
Yebo Rachel ?kuba sidudla kungakubangela netifo letimatima.
Kepha uma sinelwati lwekutsi sidlani kungasisita kutsi sibalekele lengoti sehlise nemtimba ngekutsi sikhetse kudla lokufanele kanye nekutsi sidle silinganiso lesifanele kusidla saloko kudla.
Leti titfombe tebhola yetinyawo letinamatsiselwe yindvodzana yami ?ungumlandzeli lomkhulu weBafana Bafana!
Lapha uyawubona umehluko ? labantfu labashukuma njalo nje badzinga kudla lokwehlukile kuloko kwadzadzewenu losebenta ahleti ehhovisi
Kungani kudla kubalulekile
Ligama lami nginguDudu. Kulencwajana sikhuluma ngekudla ngalokunemphilo. Kudla nguloku lokudlako nalokunatsako kute uphile. Kufanele kutsi udle kudla lokufanele kute ube nemphilo kute utewusebenta kahle nekutsi uphile sikhatsi lesidze.
Konkhe kudla kunetintfo letimbili letisenta siphile: emandla kanye nemsoco.
Imoto kuyaye kudzingeke kutsi ibe naphethilomu kute ihambe. Ngalokufanako kudla kunika umtimba wakho emandla ekuhamba newekwenta tintfo lofuna kutenta.
Umsoco nguloko lokuhle lokutfolakala ekudleni. Imisoco leyehlukene iba nemagama lahlukene kantsi inemisebenti leyehlukene leyenta emtimbeni. Umsoco lowakha umtimba uwugcine ucinile ubitwa ngekutsi ngemaphulotheyini. Umsoco lokuvikela ekutsini ungangenwa kugula ubitwa ngekutsi ngemavithamini kanye nemaminerali.
Konkhe kudla akubi nesilinganiso semandla nemsoco lokulingene.
Lokudla lokungenhla kunemsoco longuwona wakha umtimba nome-ke emaphulotheyini.
Lokudla loku kunemsoco longuwona uvikela umtimba lokungemavithamini nemaminerali.
Khumbula kugeza titselo netibhidvo ngaphambi kwekutidla.
Lokudla lokungenhla kunika emandla kakhulu. Lokunye kudla lokukulesibaya ngemantongomane nemalentils.
Iyini idayethi lenemphilo?
Idayethi yakho kudla lokudla malanga onkhe. Kute utfole wonkhe umsoco nemandla lowadzingako kufanele kutsi udle kudla lokucubile (tinhlobo letinyenti tekudla) onkhe emalanga. Kute idayethi yakho ibe ngulenemphilo kufanele ufake kunye nome ngetulu kwaloko kwekudla lokwakha umtimba nakunye noma ngetulu kwekudla lokuvikela umtimba ekudleni lovamise kukudla esidlweni ngasinye. Yetama kutsi ukhetse lokwehlukile ngesikhatsi ngasinye.
Uphindze udzinge kudla tidlo letimbili nome tintsatfu ngelilanga ngalinye. Sinye saletidlo kufanele sibe sekuseni. Bantfwana bona ikakhulukati badzinga kutsi badle lokutsite ngaphambi kwekutsi bahambe kuya esikolweni. Khumbula kutsi bantfwana bavama kudzinga lokunye kudla emkhatsini wetidlo ngobe tisu tabo titincane bangeke bakhone kudla lokunyenti ngasikhatsi sinye.
Kudla lesinako kwakulelive lakitsi kulungile ekuhlanganiseni idayethi lenemphilo. Empeleni idayethi yesintfu yabokhokho bakho (lokungulenye yalawo lasalandzelwa bantfu labanyenti) yidayethi lenemphilo kakhulu kabi.
Lokudla lokukahle lokudla malanga onkhe lokufana nemmbila, irayisi, emabele, sinkhwa, emazambane kubitwa ngekutsi kudla lokuvamile (staple foods). Lokudla kukunika emandla kanye futsi nemsoco lowakha umtimba kanjalo nalovikela umtimba. Lokudla kukwenta wesutse. Ngesizatfu sekutsi akukacoliswa (akukakhishwa emahhaye ako) kusenemahhaye ekwakheka kwako kuko, layintfo lenhle kabi kuwe.
Ngebhadi-ke labanye bantfu bayakhohlwa kutsi kudla kwabo lokuvamile kuhle kanjani. Linyenti lalabo bantfu livama kutsi liyekele kudla loko kudla uma nje like lakhona kubhadalela kudla lokudulako. Ngesizatfu saloko idayethi yabo kulokunye igcine seyingenayo imphilo.
Emaspayisi kanye netinongo tekudla
Bantfu batsela emaspayisi kanye netinongo tekudla (letifana nabokheri, bosawoti bekunonga, pelepele, shukela) ekudleni bentele kutsi lokudla kunambitseke. Linyenti lalamaspayisi netinongo tekudla atinawo nalomncane umsoco. Naloku umtimba wakho umdzinga sawoti udzinga lomncane kabi ngelilanga ngalinye; ihhafu yethispunu ngelilanga. Yetama kugwema kudla lokunasawoti lokufana nemaphayi nemashibusi.
Kudla kwekulibatisa
Kudla kwekulibatisa nguloko lokudliwa emkhatsini wetidlo. Kutsi uhle udla kudla kwekulibatisa emkhatsini wetidlo kwenta umtimba wakho usebente kahle kulo lonkhe lilanga. Bantfwana badzinga kutsi badle kudla kwekulibatisa emkhatsini wetidlo. Kulibatisa umlomo kubalulekile kepha kufanele ukhetse kudla lokuluhlobo lolufanele. Bantfu labanyenti batfokotela kudla kwekulibatisa lokufana nabomashibusi, emaswidi, emashokolethi, inamunedi, emakhekhe, emabhisikithi, litiya nelikhofi. Ngebhadi letinhlobo tekudla atinayo imphilo. Tinjalo nje tiyadula. Ngesikhatsi sekudla silibatisi, nika umntfwana wakho kudla lokufana nelisangweshi lajamu nabhotela wemantongomane, sitselo, nalokutsite kwekunatsa lokungaba ngemanti, ijusi nome lubisi.
khutsata umntfwana wakho kutsi atsenge titselo kuphela kubatsengisi labasemgwacweni.
ubokhumbula kutsi kudla kwekulibatisa akufanele kutsi kudliwe esikhundleni sekudla lokunemphilo.
Ubodlela kuhlangabetana netidzingo takho
Cishe kubili kwalokutsatfu kwesisindvo semtimba wemuntfu kwakhiwe ngemanti, kantsi tonkhe ticubu temtimba tinemanti.
Emanti akakanotsi ngalemisoco letfolakala ekudleni lokwehlukene kepha ayadzingeka kakhulu emphilweni.
Emanti abaluleke kakhulu kabi emphilweni yakho
Empeleni yonkhe indalo lephilako lefaka ekhatsi tilwane netihlahla idzinga emanti. Imisebenti lemcoka yemanti ngulena:
kugcina lizinga lekushisa lemtimba lisezingeni lelemukelekako;
kusita umtimba ukhiphe kungcola lokungafuneki emtimbeni.
Kubalulekile kunatsa emanti lokukanye tingilazi letisitfupha temanti ngelilanga kute wente siciniseko sekutsi umtimba wakho unemanti lekenele. Umtimba wakho ulahlekelwa ngemanti lamanyenti uma kushisa, ngekufoma nangekuchama. Ngemalanga lashisako uva koma (ufune lokunatfwako) kanyenti ngobe umtimba wakho usuke ushodelwa ngemanti.
Imphilo yetfu iya ngekutsi sidlani. Idayethi lenemphilo itakunika emandla lekenele kanye naleminye imisoco yekukhula, kwenta umtimba wakho ube nemphilo, kanye nekutsi usebente, kudlala nekwenta tintfo lofuna kutenta.
Labantfu laba badzinga emandla lamanyenti
Labantfu laba badzinga emandla lamancane
Ngukuphi kudla longakudla lokunemandla lafanele
Asesibuke linani lekudla lokufanele ukudle. Udla lokunganani (ikakhulukati kudla lokunemandla lamanyenti kuko), kuya ngekutsi tidzingo takho titsini. Bantfu labehlukene badzinga emandla lalinani lelehlukile.
Umntfwana udla kudla lokunemandla lafanele uma ngabe ukhula kahle ngalokwetayelekile. Khulumisana nanesi wasemtfolamphilo uve kutsi umntfwana wakho ngabe ukhula kahle yini.
Umuntfu lomdzala udla kudla lokunemandla lenele uma ngabe ahlala njalo anesisindvo lesikahle semtimba. Khuluma nanesi wemtfolamphilo kutsi akusite utfole sisindvo semtimba wakho lesifanele.
Uma umuntfu adla lokunyenti kudla lokunika emandla kunaloko lakudzingako, lokudla lokugcina kungakasetjentiswa kulondvoloteka emtimbeni njengemafutsa. Loyo muntfu ubonakala azimuka. Umuntfu losidudla kakhulu nguloyo losuke anemafutsa lamanyenti emtimbeni wakhe. Umuntfu lodla kudla lokunemandla langephansi kwalawadzingako utawondza ngobe umtimba utawusebentisa nome nguliphi lifutsa lohlangana nalo kutsi wakhe emandla.
Kufanele kutsi ube nedayethi lenemphilo kantsi kufanele udle lokwenele kuhlangabetana netidzingo takho wena wedvwa.
Idayethi lengenamphilo itakwenta nawe ungabi namphilo
Tibonelo tedayethi lengenamphilo ngunati:
Kungadli kudla lokucubile malanga onkhe
Kweca tidlo tetikhatsi letitsite njengekudla kanye kuphela ngelilanga
Kudla lokunyenti kunaloko lokudzingwa ngumtimba wakho
Kudla kudla lokusetjentwe ngimishini yasusa emahhedle ako emvelo esikhundleni sekutsi udle lokufuleshi nalokukwemvelo
BANTFU LABANEMTIMBA LOMKHULU
Banyenti bantfu labanemitimba lemikhulu kakhulu namuhla kunangesikhatsi lesengcile ngesizatfu sekutsi bantfu sebagucula indlela labaphila nalebadla ngayo.
Bantfu badla kudla lokunemafutsa lokufana nemashibusi esikhundleni seluphutfu njengesidlo sasemini. Kuletinye titsengisa kudla tetinkampani basebenti bakhona kukhetsa emkhatsini wekudla ?kwesilungu? nekutsenga kudla kwesintfu lokufana neliphalishi, sitambu, emathapha njll.
Bantfu bavama kutsi batfose kudla emafutseni esikhundleni sekukubilisa ngobe nje kutfosa kuyashesha kantsi futsi kulula.
Bantfu bavama kutsenga kudla lokunemafutsa lamanyenti lokufana nenkhukhu letfosiwe, ipholoni nemaphayi enyama.
Bantfu badla ngalokuvamile kudla kwekulibatisa lokunemandla lokufana neshokolethi nemashibusi.
Labanye bantfu banatsa tinatfo letidzakanako tibe tinyenti kanye nabhiya lomnyenti
Bantfu abasashukumisi imitimba ngalokwenele njengobe bebenta kudzala
Labanye bantfu badla silinganiso lesikhulu sekudla kwesidlo ngasinye nome kudla kwekulibatisa lokunyenti nalokungesiko emkhatsini wetidlo
Kuya ngani kungabi nemphilo kuba nemtimba lomkhulu?
Bantfu labanemitimba lemikhulu banemafutsa; lamanyenti kakhulu emtimbeni wabo. Basengotini lenkhulu yekutsi bangaba netinkinga temphilo kunalabo labangesito tidudla. Tifo letivamisile labasuke basengotini yekutsi tibangene nguleti:
Sifo senhlitiyo
Sitilokhi
Kukhuphuka kwekuntjuza kwengati ?ihayihayi
Sifo sashukela -idayabhethisi
Ematje enyongweni
Kugula kwemgogodla nemalunga labuhlungu
Tinkinga tekugaywa kwekudla ematfunjini
Letinkinga temphilo tingabanga kutsi bantfu bakhubateke nome bafe basebancane kabi. Njengobe sewubonile akusikuhle kuba sidudla.
Tecwayiso ngekunciphisa umtimba
Indlela lekahle yekunciphisa umtimba kuba kutsi uvocavoce umtimba uphindze udle idayethi lenemphilo.
Dlani kudla lokunemahhedle ako emvelo lokufana nesinkhwa sakolo lomahhedle, i-otsi, emabhontjisi, emalentills, titselo netibhidvo. Kutawusita kuvimbe indlala kuwe.
Dlani tidlo letintsatfu ngelilanga. Cala lusuku lwakho ngalunye ngesidlo sasekuseni. Uma ngabe unesidlo longakasidli uyabe sewuyalamba bese ufuna kudla lokunyenti ngemuva kwesikhatsi.
Bantfu labanyenti behlisa umtimba uma badla kudla lokuncane ngesikhatsi ngasinye.
Ungaphangisi uma udla kantsi kuhlafune kahle kudla kwakho.
Dlani kudla lokuncane ngesikhatsi ngasinye uyekele uma ucala kuva kutsi sewesutsi.
Uma unatsa emanti lamanyenti emkhatsini wetidlo utawuyiva kancane indlala.
Kunatsa tinatfo letidzakanako kukwenta uzimuke. Unganatsi.
Loku ngulokunye kwekudla lokunemandla kakhulu lokufanele ukudle kancane kakhulu. Nguloku:
Shukela: Kufanele ukugweme kudla kube kunyenti loku; shukela ekhofini nasetiyeni, shukela endenganeni, emaswidi, inamnedi, i-ayisikhrimu, jamu, luju, emakhekhe nabophudingi.
Kudla lokucolisiwe: Dlani kube kuncane kudla kwamalanga onkhe lokucolisiwe, lokufana nesinkhwa lesimhlophe, irayisi lemhlophe, fulawa lomhlophe, kudla lokulondvolotwe etikoteleni (tinned foods) kanye nakudla lesekugaywe ngimishini lokufana nepholoni. Loko kudla kunemandla lamanyenti kuko kantsi kunemsoco lomncane kanye nemahhedle ekudla lamancane.
Emafutsa nabo-oyili: Emafutsa nabo-oyili kunemandla lamanyenti ngaloko kufanele kudliwe kube kuncane kakhulu. Tibonelo taloko kudla kuba ngubhotela, emafutsa lachoncisiwe engulube, shizi lonekhrimu ngalokuphelele, majerini, ikhrimu, oyili, inyama lenemafutsa, emashibusi emazambane, emasosetji. Sebentisa oyili wekupheka (vegetable oil) lomncane kakhulu uma upheka ungakutfosi kudla. Susa emafutsa enyameni ususe nesikhumba senyama yenkhukhu (emafutsa lamanyenti aba ngephansi kwalesikhumba). Sebentisa lubisi lolunekhrimu leyehlisiwe kunalolo lolunalephelele.
Tinatfo letidzakanako kanye nabhiya: Uma kukhonakala ungacali usebentise letinatfo leti. Uma ngabe ungakhoni kuyekela kunatsa lokutjwala yenta silinganiso losinatsako sibe sincane setinatfo letidzakanako nabhiya.
Nginenkinga yesisindvo semtimba wami. Ngisidudla kakhulu kabi kantsi dokotela ungitjele kutsi anginciphise umtimba.
Umngani wami uncome kutsi kunatsa ingilazi yemanti lenejusi yelilamula njalo nje ekuseni kutangisita kutsi nginciphise umtimba wami. Ngiyakwenta loku kepha angiyiboni imiphumela.
NguHenry
Indlela longehlisa umtimba ngayo kutsi udle kube kuncane ikakhulu kudla lokunemandla, utivocavoce umtimba, ungakudli kudla lokunemandla kakhulu lokufana nashukela, kudla lokucolisiwe, tjwala, ema-oyili nemafutsa. Khumbula sizatfu sekutsi uzimuke, kube kutsi udla kakhulu kunaloko lokudzingwa ngumtimba wakho ikakhulukati kudla lokunemandla kakhulu kuko. Kutsi unatse ingilazi yemanti lanejusi yelilamula ete kwakusita kukodvwa. Empeleni alikho liphilisi, umjovo, kwekugcobisa nome umutsi wemlingo lokungasusa emafutsa lasemtimbeni wakho.
Henry, intfo lekahle lokufanele uyente kutsi udle idayethi lenemphilo, udle titselo kanye netibhidvo kube kunyenti, ungadli emkhatsini wetidlo telusuku, bese uba ngukhutsalela kushukuma lokutawuvocavoca umtimba wakho. Ngaleyo ndlela nakanjani utawehlisa umtimba wakho.
Ngike ngaya kudokotela kulamalanga lekengcile. Ungitjele kutsi nginesifo sehayihayi. Ungitjele kutsi kuntjuza kwengati yami kutawehla uma ngehlisa umtimba.
Yini lengingayidla lengehlisa lokukhuphuka kwekuhamba kwengati emtimbeni wami.
Lokhatsatekile
Lokhatsatekile
Sifo sehayihayi, kanye nesifo senhlitiyo kanye nesifo sashukela lesibangwa yindlela lophila ngayo kuvamise kutsi tibangelwe nguloku:
kuzimuka kakhulu ngobe udla kudla lokunika emandla kakhulu kunaloko lokudzingwa ngumtimba wakho kudla idayethi lengenamphilo kungabi ngumuntfu loshukumisa umtimba
Kufanele kutsi wehlise lokudlako kube kuncane, ikakhulukati kudla lokunemandla. Yenta siciniseko sekutsi udle idayethi lenemphilo. Ngalamanye emagama kufanele kutsi uphindze udle nekudla lokunemsoco wekwakha umtimba lokufana nenhlanti, nemabhontjisi kanye naloko lokunemsoco wekuvikela umtimba lokufana netibhidvo netitselo. Dlani kudla lokuncane ngesikhatsi ngasinye.
Kugweme kudla lokunemandla kakhulu lokufana nashukela, kudla lokucolisiwe, emafutsa nemawoyili, bhiya netinatfo letidzakanako.
Uma ngabe udla inyama khumbula:
susa sikhumba enkhukhwini susa emafutsa enyameni lebovu dlani inhlanti kakhulu ibe yincane inyama
Yenta siciniseko sekutsi usebentisa sawoti abe mncane ekudleni kwakho ngobe swayi lomnyenti akamuhle emtimbeni. Kubalulekile futsi kutsi uvocavoce umtimba wakho ngako-ke, ungatitfolela indlela yekutsi ushukumise umtimba. Tsatsa luhambo ngetinyawo ushakutele sikhatsi lesiyihhafu yeli-awa njalo nje elangeni lesibili.
Imisebenti lengentiwa ngulabasha
Kipilitela kudla lokunemandla kube sitfupha kulesitfombe.
Ngukuphi loku:
kudla lokunemsoco wekwakha umtimba (emaphulotheyni)?
kudla lokunemsoco wekuvikela umtimba (emavithamini nemaminerali)?
Kuhlola idayethi
Buka loku lokudliwa ngulomake. Yini lokungakalungi ngalokudla kwakhe?
Dvweba sitfombe sekudla lokunemphilo kwalomake lokutawumsita kutsi ehlise umtimba.
Hlanganani nemngani wakho. Hlelani tidlo letingaba nemphilo. Shiyelanani ngemibono ngaloku.
LOLUNYE LWATI MAYELANA NEKUDLA LOKUNEMPHILO
TINGADZE TEKUDLA
Titselo netibhidvo tikudla lokubaluleke kabi kudayethi yakho, manje yini ungakulimi? Umhoshi lomncane wembhedze wetibhidvo nome ingadze lelingana nesivalo iba melula kabi kuyinakekela wena ngekwakho. Landzela tinyatselo letilandzelako wetame kutilimela kudla kwakho. Uma ngabe unenkinga cela lusito esikolweni lesisedvute utawusitakala.
Butsa indvundvuma yetibi letifana netingono tetibhidvo, emacembe, iminyani yemmbila, timbali letifile nelukhula, tjani besiganga, emacembe kanye nalokunye lokungimisalela yesihlahla, emagebheta emacandza, ematsambo kanye nemcuba.
Ungacali usebentise lokusele enyameni, emapulastiki, tingilazi nome umlotsa wemalahle.
Yakha umbhedze wekulima longangesivalo. Ungawukala ngesipeyidi sakho; lombhedze awube budze besipeyidi sinye bubanti timbili budze bawo.
Lima lombhedze kushone nga-45cm lokusilinganiso semlente wakho kufika edvolweni. Beka umhlabatsi wakho lomnyama lowangetulu ube wodvwa kulomhlabatsi lowumbe ngephansi.
Tsela lemfucuta loyibutsele ndzawonye kulombhedze ube yihhafu. Kufanele yonkhe lemfucuta uyivitsite ibe ticucu letincane ngaphambi kwekuyisebentisa.
Nyenyeta ngemanti lemfucuta. Imfucuta lemanti ibhidlika masinyane kutsi ibe ngumhlaba kunaleyo lesuke yomile.
Mbonya lemfucuta ngemhlaba kulingasenilwe ku -15cm kushona, bese weleka ngemhlabatsi lobewungetulu.Lomhlaba longetulu kufanele ube ngulocolisakele angabi nematje nome emagadze. Lomgodzi lesewugcwalisiwe kufanele uphakame nga-15cm kunemhlaba lomunye emaceleni.
Nyalo-ke sewungahlanyela inhlayelo yakho kulengadze kube ngemalayini lavundle kulombhedze wakho wekulima.
Tihlanyele ngekunakekela tinhlanyelo takho. Atingasondzelani kakhulu. Timbonye ngemhlaba lomncane lowomile bese utsi kuwucindzetelela phansi kancane lomhlaba.
Mbonya lombhedze ngekutsi wendlale tjani lobomile, emacembe lamadzala, nome tintsi letimelula.
Nisela lengadze yakho onkhe emalanga kulamalanga ekucala lalishumi.
Vulela sikhala titfombo engadzeni yakho uma setikhule taba ngu-10cm budze.
Yenta siciniseko sekutsi ufake lobenele tjani lobomile, emacembe lamadzala lekomile nome tintsi letimelula kutsi kuvaleke wonkhe umhlaba losebaleni.
Mbonya kabusha lokukanye kanye ngenyanga.
Titjalo takho letikhulako titawusebentisa umsoco wemhlaba lokulesisedlana ngako-ke, ubokwengeta umcuba lowakhiwe ngekubotisa tibi kulengadze yakho ngaphambi kwekutsi uhlanyele titjalo letinsha kulengadze yakho.
